- 692 -

1444. Febr. 15. o. O.

Acht Edle bürgen dafür, dass Georg Slewitz wegen eines begangenen Todschlages binnen 2 Monaten sich vergleichen, oder nach Liegnitz in die Gefangenschaft zurückkehren solle.

Wir nochgeschreben Anthonius Falkenhayn, Heyncze Rotkirche von Panthenaw, Hans Pribticz, Heyncze Landiskron, Hannos Brawchatsch der Lange Cristoff Schiraw, Hannos Lewben vnd Heincze Slewitcz bekennen offintlichin mit desem brife allen, die en sehen, horen adir lesen, das wir globit haben vnd globen keiginwortiglichin in crafft deses brifes der hochgebornen furstynnen vnd frawen, frawen Elisabeth herczogynne in Slesien zw Legnicz, Goltberg etc. vnser gnedigen frawen vnd den erbarn weisen rathmannen der stat Legnicz, dy idczund synd vnd noch en seyn werden zcu der czeit seyn werden zw der stat handen vor Georgen Slewitcz vnsern frund, den sy in irer hafften haben gehabit vnd vmbe vnser bete willen vf vns vnd vnser globde aws solichen banden geloszen haben, vff solichen bescheid, als hirnoch geschrebin steet, das her sy solicher ansproche dy denne Hannos Slewitcz seyn bruder zw en meynet zw haben vnd bis hyher getan hat, ledigen, freien vnd benemen sal, vnd sal schaffen, das her soliche ansprache keigen en lediglich abethwe, vnd der fordermer nymmer anlange in keynerweise, vnd auch, das her sich fugen vnd fruntlichin entsetczen solle mit Eychen vnd den, die das anlangende ist, vmbe den todslag an seynem frunde begangen, vnd doromme den genanten Eychen vnd dy das anlangende ist vnd alle, dy in den sachen vordacht synd, nymmer czw argen noch anczulangen. Vnd sal in des aws der stat nicht komen, bis her das zw ende brenget; vnd awch, das her vmb solich gefengnis keigen en noch allen den iren nymmer kevne ansproche tuen noch haben solle durch sich noch durch andere czu ewigen (!). Ab her des nicht tete czwisschin hy vnd pfingisten neestkomende vnd ditcz zw ende nicht brechte, also fore geschrebin steet, vnd der irgend eyns nichten hilde, so globe wir en in dy selben bandt wedir zw gesteilen, tot adir lebende, ane alle weergelt vnd wedirrede, ane allis arg vnd geferde. Czw geczewgnis haben wir obgenanten burgen vnsere ingesigele an desen brif mit wissen gehangen. Das ist gescheen am sonnobunde noch Valentini, noch gotis geburt tawsund virhundirt iar im viervndvirczigisten iare.

O. d. St. L. No. 379. An Pergamentstreifen die acht Siegel, die aber bis auf die von Falkenhain und Rothkirch mehr oder minder unkenntlich geworden sind.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866